लेक सासरला जाता
दुःखी पाकळी फुलात
वेली विना सुन्या भिंती
लेक सासरला जाता
रडे तुळस एकांती ||१||
रडे तुळस एकांती
संगे बागेतली फुलं
गुंजे नाद पैंजणांचा
मुकी कानातली डुलं ||२||
मुकी कानातली डुलं
ओठी माहेराची गाणी
लेक निघता सासरी
डोळा ओथंबले पाणी ||३||
डोळा ओथंबले पाणी
झाला पोरका ह्यो मळा
लेकी विना झुलतोय
नाग पंचमीचा झुला ||४||
नाग पंचमीचा झुला
लेक कोरीव गोंदण
याद यावी माहेराची
लेकी तुळस आंदण ||५||
लेकी तुळस आंदण
कन्यादान सावरत
आला घेऊन सोंगाड्या
माहेराचा रुखवत ||६||
माहेराचा रुखवत
हिर्व्या रंगाने गडद
अशी सजली मांडवी
तुझ्या अंगाची हळद ||७||
तूझ्या अंगाची हळद
मुक्या आठवांचा मार
रड लेकी रड आता
कर हलकासा भार ||८||
